Maidir le Tailte Éireann

Is gníomhaireacht neamhspleách Rialtais í Tailte Éireann faoi choimirce na Roinne Tithíochta, Rialtais Áitiúil agus Oidhreachta. Bunaíodh Tailte Éireann go hoifigiúil faoi Acht um Tailte Éireann  i mí na Nollag 2022.

Cé go mb’fhéidir go bhfuil ár n-ainm sách nua, tá ceangal fada fréamhaithe againn le talamh na hÉireann, ag dul siar go dtí bunú Chlárlann na nGníomhas i 1708 agus an chéad léarscáil suirbhéireachta ar oileán na hÉireann a thosaigh in 1824.

Tá foireann de bhreis agus naoi gcéad ball againn lonnaithe in áiteanna ar fud na tíre, atá tiomanta do sheirbhís éifeachtach atá dírithe ar an gcustaiméir a sholáthar.Tá ár bhfoireann comhdhéanta de raon leathan státseirbhíseach lena n-áirítear aturnaetha, luachálaithe, suirbhéirí, cartlannaithe a bhfuil taithí na mblianta acu ina réimsí faoi seach.Léigh tuilleadh faoin bhfoireann, agus deiseanna a bheith linn, inár rannóg Gairmeacha.

Táimid bródúil as raon seirbhísí maoine, mapála agus cartlainne a sholáthar dár gcustaiméirí agus dár gcomhpháirtithe thar ceann an Stáit.

Cuirimid córas clárúcháin úinéireachta talún in Éirinn ar fáil trí Chlár na Talún agus Chlárlann na nGníomhas a bhainistiú. Gach bliain, cláraítear éifeacht dhlíthiúil breis agus 200,000 idirbheart maoine agus slánaimid na gníomhais bhunaidh inár gCartlann.

Cuirimid luachálacha beachta, cothrom le dáta ar réadmhaoin tráchtála, tionsclaíochta agus faoi úinéireacht an stáit ar fáil dár bpáirtithe leasmhara agus coinnímid taifid inrochtana ar rátaí maoine tráchtála d’Údaráis Áitiúla agus don phobal.

Cruthaíonn agus coimeádann ár suirbhéirí na taifid mapála deifnídeacha agus bonneagar fisiciúil an Stáit.Táirgeann muid táirgí digiteacha agus léarscáileanna páipéir le húsáid ag raon custaiméirí, lena n-áirítear ranna Rialtais, gairmithe mapála, staraithe agus siúlóirí cnoic.

Ina theannta sin, táimid mar choimeádaithe ar chartlann fhairsing de thaifid uathúla a dhoiciméadaíonn an t-athrú ar úinéireacht réadmhaoine agus ar an tírdhreach fisiceach le trí chéad bliain anuas, ar acmhainn fhíorluachmhar é do thaighde ginealais agus staire in Éirinn.