Ceadaímid úsáid sonraí i bhformáid dhigiteach do raon leathan feidhmchlár ríomhaire-bhunaithe mar Fhaisnéis Gnó (BI), Dearadh Ríomhchuidithe (CAD) agus Córais Faisnéise Geografaí (GIS). Tá go leor cumas ag baint le sonraí digiteacha, lena n-áirítear cumais sonraí nasctha, lena soláthraítear uirlis chumhachtach oibríochtúil, mhargaíochta agus chinnteoireachta. Is féidir sonraí léarscáilithe digiteacha a sholáthar i raon formáidí agus réamh-mheastachán.
Baintear ár sonraí DLMCore as bunachar sonraí PRIME 2; creat digiteach caighdeánaithe údarásach lenar féidir tagairt agus comhtháthú comhsheasmhach a dhéanamh ar shonraí a bhaineann le suíomh. Tagann na sonraí atá san áireamh ó mheascán d’fhoinsí; ath-innealtóireacht a dhéanamh ar shonraí ón mbunachar sonraí digiteach roimhe seo, agus sonraí nua a bhreacadh ó ortafótagrafaíocht nó a gabhadh ar an láthair ag GPS. Leis an tSamhail Tírdhreacha Dhigiteacha (DLM), is féidir na sonraí a shannadh le meiteashonraí, lena n-áirítear lipéid téacs (logainmneacha etc.) agus stádas saolré (lena léirítear cathain a rinneadh réada aonair a mhapáil, a leasú nó a scriosadh den chéad uair).
Is féidir linn sonraí Airde, Stairiúla agus Fionnachtana a sholáthar i bhformáidí digiteacha chomh maith le leagan digiteach dár bPacáiste Pleanála móréilimh. Ina theannta sin, chuireamar roinnt dár dtacair sonraí digiteacha ar fáil mar shonraí oscailte. Is féidir iad sin a fhiosrú ar an Tairseach Sonraí Oscailte Suirbhéireachta.
Tá ceannach agus úsáid sonraí digiteacha faoi réir téarmaí agus coinníollacha ceadúnaithe. Is féidir leo siúd ar mian leo níos mó sonraí digiteacha a cheadúnú ná mar atá ar fáil ón siopa ar líne teagmháil a dhéanamh le digitals@tailte.ie.