Is iad na taifid luachála atá inár gcartlann na cóipeanna bunaidh de na Leabhair Athbhreithnithe Luachála a lean na taifid Luachála Príomhúla . Tá na taifid Luachála Príomhúla (dá ngairtear Luacháil Griffiths go coitianta, i ndiaidh an chéad Choimisinéir Luachála, an Ridire Richard Griffith) ar fáil tríd an gCartlann Náisiúnta .Coinnímid cóipeanna díobh seo inár gcartlann.
Is ó lár na 1850idí go dtí an lá atá inniu ann na leabhair iar-luchála bunaidh atá againn. I gcás maoine cónaithe, cumhdaítear lenár dtaifid an tréimhse go dtí na 1980idí don chuid is mó, ach déantar luacháil ar mhaoin tráchtála go dtí an lá atá inniu ann. Is é atá inár dtaifid an fhaisnéis uile a bhaineann le luacháil gach sealúchais aonair laistigh den stát. Tá taifid Luachála na sé Chontae i dTuaisceart Éireann á gcoinneáil in Oifig na dTaifead Poiblí i dTuaisceart Éireann (PRONI) i mBéal Feirste.
Tá cóipeanna bunaidh de na léarscáileanna luachála a lean an luacháil príomhúil againn freisin, a thaispeánfaidh suíomh beacht na maoine a bhfuil taighde á dhéanamh agat ina leith . Coinnímid sraitheanna éagsúla léarscáileanna a nuashonraíodh i rith na mblianta agus a léiríonn aon fho-roinnt talún a d’fhéadfadh a bheith déanta. Athraíonn na blianta le haghaidh nuashonruithe na léarscáileanna seo ó áit go háit.
Cén fhaisnéis atá sna leabhair seo
Taispeánfaidh an fhaisnéis a gheofar inár dtaifid ainm(neacha) an Áititheora, an Léasóra Láithrigh, cur síos ar an maoin, aon acraíocht a bhaineann leis an maoin, na rátaí gaolmhara is infheidhme maidir leis an maoin, agus taifid ar dhátaí aon athraithe/athruithe ar an maoin. Mar shampla, taispeánfaidh sé cathain a chuirtear duine eile in áit áititheora/léasóra láithreach maoine, agus an dáta a tharla an t-athrú seo. Déanfar tagairt sna leabhair freisin don uimhir gabháltais Luachála agus d’uimhir léarscáile na Suirbhéireachta Ordanáis do gach maoin, agus ansin is féidir iad seo a chur i gcomparáid leis na léarscáileanna Luachála atá againn.
An féidir liom na taifid a fheiceáil ar líne?
Faoi láthair, níl ár dtaifid ar fáil ach inár n-oifig. Cé go ndearna muid cuid mhór den bhailiúchán a dhigitiú, ní féidir na taifid sin a fheiceáil ach ar cheann dár gcuid teirminéal do chuairteoirí inár nOifig Phoiblí.
Cad a tharlóidh sa chás nach féidir liom dul chuig an oifig?
Mura bhfuil tú in ann cuairt a thabhairt ar ár n-oifig, cuirimid seirbhís ar fáil inar féidir leat iarratas a dhéanamh chugainn, agus is féidir le ball foirne an taighde a dhéanamh ar do shon. Tá táille seasta €30 ar an tseirbhís seo agus féadfar costais bhreise a thabhú i gcás ina n-iarrtar líon mór cóipeanna crua cde na taifid tríd an bpost. Níl aon táillí breise ann ar taifid a sheoltar go leictreonach. Chun iarratas a dhéanamh chugainn, líon isteach foirm iarratais C3 agus seol ar ais í leis an oiread eolais agus is féidir.Nuair a bheidh an fhoirm comhlánaithe, seol chugainn í trí ríomhphost chuig valinfo@tailte.ie nó tríd an bpost chuig Tailte Éireann, Valuation Public Office & Archive, Bloc 2 Main Plaza, Irish Life Centre, Mainistir Shráid Íochtarach, Baile Átha Cliath 1, D01 E9X0.
